500 illik sirr və 20 illik araşdırma: Alimlər Xristofor Kolumbla bağlı iki müəmmanı öyrəndilər

İspan alimləri Xristofor Kolumbun ölümündən beş əsrdən çox vaxt keçməsinə baxmayaraq, tədqiqatçı ilə bağlı iki qədim sirri öyrənə biliblər. Bunun üçün onlar 20 illərini sərf ediblər.

Oxu.Az-ın verdiyi məlumata görə, bu barədə "Kommersant" xəbər yayıb.

Bildirilir ki, bu günə qədər Sevilya kafedralındakı möhtəşəm məqbərədə dəfn edilən qalıqların həqiqətən ona məxsusluğu mübahisə mövzusu olub. Həmçinin, dünya tarixinin gedişatını dəyişən dənizçinin həqiqətən uzun müddətdir iddia edildiyi kimi genuya mənşəli, yoxsa əslində bask, katalan, qalisiyalı, yunan, yəhudi və ya portuqal olması müzakirə edilib.

Yeni Dünyanı kəşf edənin cəsədinin ölümdən sonrakı "səyahətləri" bu məsələlərin araşdırılmasını daha da çətinləşdirib. Belə ki, Kolumb 1506-cı ildə İspaniyanın Valyadolid şəhərində vəfat etsə də, bu gün Haiti və Dominikan Respublikası arasında bölünmüş Karib adası Espanyolada dəfn olunmaq istəyirdi. Onun qalıqları 1542-ci ildə oraya aparılıb, 1795-ci ildə Kubaya göndərilib və 1898-ci ildə İspan-Amerika müharibəsindən sonra İspaniya Kubaya olan nəzarətini itirdikdə Sevilyaya qaytarılıb.

Lakin 20 illik DNT analizi və tədqiqatlardan sonra Sevilya kafedralındakı natamam qalıqların həqiqətən Kolumba məxsusluğu öyrənilib.

"Bu gün yeni texnologiyalar sayəsində Sevilyadakı qalıqların Xristofor Kolumba məxsus olması ilə bağlı əvvəlki nəzəriyyələr qəti şəkildə təsdiqləndi", - deyə Qranada Universitetində tədqiqata rəhbərlik edən məhkəmə-tibb eksperti Xose Antonio Lorente bildirib.

Bu nəticə məqbərədən götürülmüş DNT nümunələrinin Kolumbun qardaşı Dieqo və oğlu Fernando ilə götürülmüş digər nümunələrlə müqayisəsi nəticəsində əldə edilib.

Tədqiqatçının dəqiq mənşəyi ilə bağlı daha mürəkkəb sual bu gün İspaniyanın milli gününü qeyd etdiyi və Kolumbun Yeni Dünyaya gəlişini qeyd etdiyi gün "Kolumbun DNT-si: Onun həqiqi mənşəyi" adlı xüsusi televiziya proqramında açıqlanacaq.

Kolumbun haradan olması ilə bağlı bir çox fərziyyələr irəli sürülsə də - versiyalara İtaliya, İsveç, Norveç, Portuqaliya, Fransa, Yunanıstan, Şotlandiya və İspaniyanın bir neçə müxtəlif regionu daxildir - proqramın yaradıcıları indi cavabın onlarda olduğunda israr edirlər.

Araşdırmanı çox mürəkkəb adlandıran Xose Antonio Lorente hələ də onun nəticələri barədə susur. Bununla belə, o, əvvəllər Kolumbun həqiqətən genuya mənşəli olduğuna inandığını kifayət qədər açıq şəkildə bildirib.