"Gilan Holding": "Yanlış məlumatdır" - AÇIQLAMA

"Hörmətli media nümayəndələri, Azərbaycan Respublikasının Maliyyə Bazarlarına Nəzarət Palatası (Palata) tərəfindən “Gilan Holding”-in xaric ilə valyuta əməliyyatları ilə bağlı nöqsana görə cərimələnməsi barədə yayılmış yanlış məlumata dair təkzib olaraq bildiririk: belə ki, həqiqətən Palata tərəfindən “Gilan Holding” MMC-yə inzibati Protokol tərtib edilmiş, lakin daha sonra sözügedən Protokol Yasamal rayon Məhkəməsi tərəfindən ləğv olunmuşdur. Palata tərəfindən həmin qərardan Bakı Apelyasiya Məhkəməsinə şikayət verilib".

"Gilan Holding"dən News24.az-a verilən məlumata görə, bu səbəbdən Holdinqin cərimələnməsi barədə yayılmış məlumat əsassız olaraq, böhtan xarakteri daşıyır. Eyni zamanda, bildiririk ki, yazılarda qeyd olunduğu kimi Cəmiyyətin “Azsığorta” kimi maliyyə qurumlarında əsas səhmdar olması barədə məlumat, həmçinin həqiqətə uyğun deyildir.

Qeyd olunanlarla əlaqədar bildirmək istəyirik ki, “Gilan Holding”-in işgüzar nüfuzuna xələl gətirəcək böhtan və təsdiq olunmamış məlumatların yayılması gələcəkdə məhkəmə qaydasında həll olunacaq. “Kütləvi informasiya vasitələri haqqında” Azərbaycan Respublikası Qanununun 45-ci maddəsinə əsasən, bu təkzib məktubunun dəyişiklik edilmədən yayımlanması xahiş olunur.