“Elinanın gündəliyində "ölümümə 52 gün qalıb” yazılmışdı" - SEVİNC ABBASOVA

Səbail Rayon Məhkəməsində 162 saylı məktəbdə intihar edən şagird Elina Hacıyevanın ölümü ilə bağlı növbəti məhkəmə prosesi keçirilib.

News24.az-ın xəbərinə görə, hakim Azər Tağıyevin sədrlik etdiyi prosesdə Sevinc Abbasova ilk dəfə ifadə verib. O, bundan öncəki proseslərdə danışmaqdan imtina etmişdi, bildirmişdi ki, ən sonda ifadə verəcək. S.Abbasova bildirib ki, hadisə saat 7:30-da işdə olub:
"İkinci dərs bitəndən sonra tənəffüsdə müavinim Tünzalə Mikayılova ilə birlikdə işləri müzakirə edirdik. Bu zaman müəllimə gəlib həyətdə bir uşağın yıxıldığını dedi. Sonra gördük ki, uşaqlar Elinanı qucaqlarına götürüb içəri girirdilər. Elə bildim onu kimsə itələyib. Elina da dedi ki, onu heç kim itələməyib. Elinanı mənim otağıma apardıq. Məktəbə girəndə tibb bacısının otağını açmaq istədim, bağlı idi, yerində deyildi. Sonra kameralara baxanda bildim ki, həmin gün işə gecikib. Elinanı otağımda divana uzadandan sonra o danışmaq istədiyini dedi. Elina dedi ki, 3 aydır Tramadol atıram, amma son 3 gündə tapa bilmədiyim üçün hər gün 1 paçka “ketotifen” içirəm. Sonra da çantasından “ketotifen” qutusu çıxdı. Tibb bacısı gəlib dedi ki, sınıq, gözlə görünən xəsarət yoxdur. Yadımda deyil, həkimə ilk olaraq kim zəng etmişdi, amma istintaqda bəlli oldu ki, mən zəng etmişəm. Sonra valideynlərə xəbər verdik, artıq 10-a yaxın polis məndən izahat alırdı. Onlar tabletka məsələsi ilə maraqlanırdılar, sualların çoxuna Elina özü cavab verirdi. Sonra da Xalidə Bayramova gəldi, polislər Elinanın çantasını gətirdilər, içindən 20 ədəd psixotrop dərmanın adları yazılan vərəq çıxdı. Həm də Elinanın gündəliyi var idi, orada yazılmışdı ki, "ölümümə 52 gün qalıb, mənim həyatım zibil kimidir". Hesabladılar, bu, aprelin 7-nə düşürdü. Xalidə Bayramova "skoru" maşınında Elina ilə birlikdə getdi. Biz sonra kamerada baxanda gördük ki, Elina 3-cü mərtəbədən yıxılıb. İki həftə əvvəl ikinci mərtəbədən iki uşaq pəncərədən düşərək dərsdən qaçmışdılar. Mən də buna görə elə bilirdim ki, Elina ikinci mərtəbədən düşüb. Sonra xəstəxanaya getdim, valideynləri orada yox idi. Yarım saat sonra Fazil həkim Elinanı UZİ-yə aparanda gördüm. Elina dedi ki, uşaqlardan kim istəsə mənim yanıma gəlsin, uşaqlara salam göndərdi. UZİ-dən sonra bizə dedilər ki, hər şey yaxşıdı, bircə sidik kisəsində ləkə var. Dedilər qan olsa, əməliyyat edəcəyik, Elina bunu eşidəndə bir az qorxdu. Aprelin 6-da prokurorluqda ifadə verəndə Elinanın öldüyünü eşitdim. Həmin vaxt müstəntiq soruşdu ki, özünü təqsirli bilirsən? Mən də dedim ki, qismən təqsirli bilirəm, çünki onu incitməklərindən xəbərim olmayıb. Həm də affekt vəziyyətdə olduğum üçün "skoru" gec çağırmışam. Kimlərə zəng etdiyimi də xatırlamıram. İndi isə özümü təqsirli bilmirəm. Elina psixoloqla ancaq saçını rəngləməsi məsələsini müzakirə edib, intihar etmək istəməsi ilə bağlı heç bir qeyd yoxdur. Elina birinci dəfə boğazını kəsəndə soruşdum, dedi, intihar üçün etməmişəm. Mən bu haqda polisə məlumat vermişdim. Elina 1 həftə sonra ikinci dəfə boğazını kəsəndə səbəbini soruşdum dedi ki, "cool" görünmək üçün belə edib. Bu formada şəkillər çəkib İnstagrama da qoymuşdu. Mənə təsəlli verən budur ki, Elina məktəbdə yox, iki gün sonra xəstəxanada öldü. Xalidə Bayramovanın onu gözləməyimlə bağlı mənə tapşırıq verməsi yadmda deyil, "skoru" çağırmamaqla bağlı isə mənə heç kim göstəriş verməyib".

Anası Sevil Hüseynova deyib ki, Elinanın gündəliyində intiharla bağlı yazdığı sözlər bir kitabdan sitat olub. Elinanın ailəsinin vəkili mülki iddiaya əlavə verərək bildirib ki, 100 min manatlıq təzminatdan əlavə dəfn xərclərinə çəkilən 8500 manat da ödənilsin. Proses oktyabrın 11-də davam etdiriləcək.