Kuryoz hadisə: Poroşenko qapıları səhv saldı - Lavrovdan tualet zarafatı

Nyu-Yorkda keçirilən BMT Baş Assambleyasında iştirak etmək üçün ABŞ-a səfər edən Ukrayna prezidenti Petro Poroşenko rusiyalı jurnalistlərdən canını qurtarmaq üçün təsadüfən Rusiya nümayəndə heyətinin görüş keçirdiyi otağa daxil olub. 

Kuryoz hadisə Ukrayna liderinin mühafizəçilərinin müşayiəti ilə dəhlizdə hərəkət etdiyi zaman baş verib. 
Qeyd edilib ki, Rusiya telekanalının jurnalisti Poroşenkoya Donbasda sülhməramlı missiya ilə bağlı sual verib. Poroşenko bu suala “feyk-nyus” cavabını verib və qarşısına çıxan ilk qapıdan içəri girmək istəyib. 

Həmin otaqda isə Rusiya xarici işlər naziri Sergey Lavrov görüş keçirirmiş. Bunu görən Poroşenko otağı tərk edib və iclas zalına doğru irəliləyib. Lavrov insidenti zarafatla şərh edib. 

“Yəqin, tualetlə səhv salıb”, - nazir deyib. 

“RİA Novosti” agentliyi isə Ukrayna prezidentinin Rusiya nümayəndə heyətinin görüş keçirdiyi otağa deyil, qonşuluqdakı kabinetə keçdiyini bildirib. 

//oxu.az