Qardaşı Aprel döyüşlərində, özü isə Şuşada şəhid oldu - Video

"İkisi də hərb sənəti seçməklə mənim arzularımı gerçək edib. Uşaqlıqdan hərb sənətinə marağım çox olub. Gələndə ikisinin də alnından öpərdim ki, arzularımı doğrultdunuz. Düşmən bilməməlidir ki, şəhid hərbçi anası bükülmür. Biz onlara göstərməliyik ki, igidlərin dalında igid durur". 

News24.az-ın məlumatına görə, bu sözləri AzTV-yə müsahibəsində Masallıdan olan iki şəhid İntiqam və Nurlan qardaşlarının anası Ziba Əsgərova deyir.

Qardaşlardan biri Nurlan Əsgərov Aprel döyüşlərində şəhid olub. İntiqam Əsgərov isə budəfəki Vətən müharibəsində canından keçib. Hər ikisi Xüsusi Təyinatlı Qüvvələrin giziri idi. Nurlan snayper idi, düşmənin xeyli sayda qüvvəsini məhv edib. Döyüş meydanından cansız bədənini qardaşı İntiqam çıxarmışdı. Sonra yenidən döyüşə qayıtmışdı. İntiqam Əsgərov isə Vətən müharibəsində Şuşa uğrunda döyüşdə şəhid olub.

Şəhid atası Bayram Əsgərov da deyir ki, əsas ağrılı yeri Qarabağın işğal altında olması idi: "Torpaqlarımızı geri qaytarmağa nail olduq".