“Qarabağ”da dopinq yoxlama aparılmasının səbəbi açıqlandı (RƏSMİ)
    • 25-10-2018, 16:20
    • 735

“Qarabağ”da dopinq yoxlama aparılmasının səbəbi açıqlandı (RƏSMİ)

Azərbaycan Milli Anti Dopinq Agentliyinin (AMADA) UEFA Avropa Liqasının 3-cü turu çərçivəsində "Vorskla”ya qarşı keçiriləcək oyun ərəfəsində "Qarabağ” futbolçularını dopinq yoxlanışına cəlb etməsi narazılıqla qarşılanıb. AMADA-nın rəhbəri Şəfəq Hüseynli isə burada qeyri-adi heç nəyin olmadığını deyib: "Hansısa klubda yoxlama aparılmasının bir çox səbəbi olur. Dopinq yoxlanışı AMADA-nın planına əsasən və ya hansısa sifariş, eləcə də, quruma daxil olan informasiya əsasında həyata keçirilə bilər. Bu, standard prosedurdur və artıq iki ildir ki, biz bunu tətbiq edirik. Artıq futbolçular və digər idmançılar da buna öyrəşiblər. AMADA idmançıları məşq və ya yarış vaxtı, yarışdan bir gün öncə, hətta onların evlərində də, bir sözlə, hər vaxt hər yerdə yoxlaya bilər. Bunu AMADA özü planlaşdırır. Buna heç kim müdaxilə etmir və edə də bilməz”.
"Qarabağ” klubunda keçirilən yoxlanış barədə də danışan Ş.Hüseynli "Heç bir problem yaranmadı və qısa vaxtda rahat bir şəraitdə dopinq yoxlaması keçirildi. Futbolçular heç bir narazılıq etmədilər. İnşallah, bu gün uğurlu oyun olar”, - deyə sözlərinə əlavə edib.
Yoxlanışın nəyə əsasən keçirildiyi barədə məlumat verə bilməyən AMADA rəhbəri "Avropada informasiya mübadiləsi ilə bağlı yeni standardlar qəbul olunub. Biz də həmin standardlara uyğun olaraq belə informasiyaları məxfi saxlayırıq”, - deyə bildirib.

Ş.Hüseynli belə yoxlanışların çox keçirildiyini və digər Azərbaycan klublarının da buna cəlb olunduğunu söyləyib: "Biz təkcə "Qarabağ”da yoxlama aparmamışıq. İndiyə qədər digər Azərbaycan klublarında da buna bənzər yoxlamalarımız olub. Başa düşə bilmirəm, niyə "Qarabağ”da aparılan yoxlama belə əks-sədaya səbəb olub”.

Nəticələrin nə vaxt çıxacağı ilə bağlı AMADA rəhbəri bunları deyib: "Bu proses, adətən, iki həftə çəkir. Nəticələr mənfi çıxsa, bu barədə ictimaiyyətə heç bir açıqlama təqdim olunmur. Müsbət çıxacağı təqdirdə isə müəyyən edilmiş tarixdə AMADA tərəfindən rəsmi məlumat verilir”.

Qeyd edək ki, AMADA-nın əməkdaşları gözlənilmədən "Qarabağ”ın məşq etdiyi Bakı Olimpiya Stadionuna gediblər. Daha sonra isə agentliyin nümayəndələri komandayla birgə "Qarabağ”ın Suraxanıdakı bazasına yollanıblar və 7 futbolçu - Ernesto Emeqara, Simeon Slavçev, Abdullah Zubir, Ansi Aqolli, Araz Abdullayev, Şahruddin Məhəmmədəliyev və Abbas Hüseynovdan dopinq-test götürüblər.

//sportLine.a