Şuşada ermənilərin atıb qaçdığı çoxlu sayda silah-sursat, 19 raket sistemi aşkar edildi - Fotolar

Ötən il sentyabrın 27-də cəbhədə növbəti erməni təxribatına cavab olaraq Azərbaycan Silahlı Qüvvələrinin əks-hücum əməliyyatları 44 gün davam edərək, düşmənin 30 ilə yaxın  işğalda saxladığı ərazilərimizin azad edilməsi ilə nəticələndi. Vətən müharibəsində düşmən ordusu tamamilə darmadağın edildi. Noyabrın 8-də Azərbaycan əsgəri tariximizin və mədəniyyətimizin Şuşa zirvəsinə üçrəngli bayrağımızı sancdı. 

DİN Mətbuat Xidmətindən News24.az-a verilən məlumata görə, Şuşa şəhərinin azad edilməsi ilə düşmən kapitulyasiya aktına imza atmağa məcbur oldu. Bu, Azərbaycanın Zəfər Günü, düşmənin isə qəti mğlubiyyəti idi. 8 Noyabr tariximizə Zəfər Günü kimi həkk olundu. Bu gün Şuşa Zəfərinin, Qarabağ Zəfərininin bir ilini qeyd edirik. Bir il ərzində Şuşa şəhəri özünün yeni dövrünü yaşayır. Şəhər günü-gündən tikilir, qurulur, dirçəlir, gözəlləşir. Bu istiqamətdə çoxşaxəli tədbirlər bir an da səngimir.

Rayon Polis Şöbəsinin əməkdaşları müvafiq nəzarət-profilaktik tədbirlər keçirir, təhlükəsizliyin və asayişin təmin edilməsi məqsədi ilə zəruri işlər görürlər.

Erməni hərbi birləşmələrinin şəhər ərazisində atıb qaçmağa məcbur olduğu silah sursatlardan təmizlənməsi üçün Şuşa Rayon Polis Şöbəsinin əməkdaşları tərəfindən aidiyyəti qurumlarla birgə nəzarət-profilaktiki tədbirlər görülür. Belə ki, son bir il ərzində keçirilən tədbirlərlə xeyli sayda silahlar, partlayıcı maddələr və digər sursatlar aşkar edilib. Polis əməkdaşları şəhər ərazisindən və ətraf kəndlərdən 5 mina, 31 avtomat, 4 pulemyot, 6 qumbaraatan, 207 qumbara və digər partlayıcı maddələr, 78 müxtəlif növ mərmi, 19 “Foqot” və digər idarə olunan raket sistemləri, 45 mindən artıq müxtəlif çaplı patronlar və başqa sursatlar aşkar edərək aidiyyəti üzrə təhvil veriblər. 

Bundan başqa Şuşa Rayon Polis Şöbəsinin Daşaltı kəndində keçirdyi tədbirlər nəticəsində çəkisi 1 ton 600 kiloqramdan artıq olan 2437 ədəd çətənə bitkisi məhv edilib.

Bu istiqamətdə tədbirlər davam etdirilir.