Bu mağazada vaxtı keçən məhsullar aşkarlandı

Şəmkirdə ərzaq mağazasında istifadə müddəti bitən məhsullar aşkarlanıb.

Azərbaycan Respublikasının Qida Təhlükəsizliyi Agentliyindən (AQTA) News24.az-a verilən məlumata görə, Agentlik əməkdaşları Şəmkir şəhəri, 20 Yanvar küçəsində fəaliyyət göstərən, fiziki şəxs Bayraməliyev Rəşid Musa oğluna məxsus ərzaq satışı mağazasında planlı yoxlama keçirib.

Yoxlama zamanı ərzaq mağazasında qida təhlükəsizliyi sahəsində normativ hüquqi sənədlərin tələblərinin kobud şəkildə pozulduğu, həmçinin istifadə müddəti bitmiş müxtəlif əmtəə nişanlı şirniyyatların və meyvə şirələrinin qanunsuz satışının həyata keçirildiyi aşkar edilib.

Aşkar olunmuş faktla bağlı istehlaka yararsız məhsullar satış şəbəkəsindən çıxarılaraq məhv edilib, sahibkar barəsində inzibati qaydada tədbir görülüb.