Rusiya Aİ-nin Ermənistan-Azərbaycan sərhədinə missiya göndərməsinə münasibət bildirdi

Rusiya Aİ-nin Ermənistan-Azərbaycan sərhədinə missiya göndərməsinə münasibət bildirdi
SİYASƏT

11-10-2022, 17:57

Mətn ölçüsü

Rusiya Avropa İttifaqının Ermənistanın Azərbaycanla sərhədinə mülki missiya göndərməsinə münasibət bildirib.

News24.az APA-ya istinadən xəbər verir ki, Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi brifinqdə Ermənistanın təklifi ilə Aİ sərhəd missiyasının göndərilməsi ilə bağlı suala cavabında bu məlumatdan xəbərdar olduğunu bildirib.

“Anladığım qədər Avropa İttifaqında bununla bağlı formal qərar hələlik qəbul olunmayıb. Biz buna təəssüflər olsun ki, Avropa İttifaqının Bakı ilə İrəvan arasında münasibətlərin nizamlanmasına növbəti dəfə bütün vasitələrlə mane olmaq, Rusiyanın vasitəçilik səylərini məhdudlaşdırmaq cəhdi kimi baxırıq. Əlbəttə ki, bu, suveren dövlətlərin məsələsidir. Onlar öz münasibətlərini qururlar”, - Rusiya XİN sözçüsü vurğulayıb.

Zaxarova Aİ-nin Ukrayna münaqişəsi ilə bağlı 8 il davam edən uğursuz vasitəçilik missiyasından danışıb.

“Ona görə də biz hesab edirik ki, Bakı ilə İrəvanın barışmasının, regionda dayanıqlı sülhün və uzunmüddətli sabitliyin bərqərar olmasının yeganə açarı Rusiya, Azərbaycan və Ermənistan liderlərinin üçtərəfli bəyanatlarının tam şəkildə həyata keçirilməsidir. Bu məsələ ilə bağlı azərbaycanlı və ermənistanlı həmkarlarımızla müntəzəm təmasları dəstəkləyirik. MDB XİN başçıları Şurasının Astanadakı iclası çərçivəsində keçiriləcək tədbirindən istifadəyə ümid edirik”,- deyə Rusiya XİN-nin rəsmi nümayəndəsi qeyd edib.