Astarada “Narkomaniyaya yox deyək” mövzusunda görüş keçirilib

Astara Rayon Polis Şöbəsinin təşkilatçılığı ilə şəhər Mədəniyyət Mərkəzində məktəblilərlə “Narkomaniyaya yox deyək” mövzusunda görüş keçirilib.

Daxili İşlər Nazirliyinin mətbuat xidmətindən News24.az-a bildiriblər ki, əvvəlcə tədbir iştirakçıları narkotik vasitələrin cəmiyyətdə səbəb olduğu acı nəticələr və insan orqanizminə vurduğu zərərlər barədə videoçarx izlənilib.

Astara Rayon Polis Şöbəsinin şəxsi heyətlə iş üzrə rəis köməkçisi, polis mayoru Ceyhun Abdulov, rayon icra hakimiyyəti başçısının müavini Firəngiz Sadıxova, Gənclər və İdman İdarəsinin rəisi Rufan Şirinov və digərləri çıxış edərək bəşəriyyət üçün böyük bəla sayılan narkomaniyaya qarşı görülən tədbirlərin bu gün xüsusilə aktual xarakter daşıdığını, narkotiklərin qanunsuz dövriyyəsinə qarşı aparılan mübarizənin hər zaman ölkə rəhbərliyinin diqqət mərkəzində olduğunu və bu istiqamətdə mühüm tədbirlər həyata keçirildiyini bildiriblər.

Sonra məktəbliləri maraqlandıran suallar cavablandırılıb və mövzu ətrafında fikir mübadiləsi aparılıb.