Cənubi Koreya və ABŞ birgə aviasiya təlimlərini başa vurub

Koreya Respublikası və ABŞ hərbçiləri 240-a yaxın təyyarənin iştirak etdiyi, eləcə də KXDR-nin buna çoxsaylı raket buraxılışları ilə cavab verdiyi “Vigilant Storm” birgə aviasiya təlimini başa vurub.

News24.az xəbər verir ki, bu barədə “Yonhap” agentliyi məlumat yayıb.

Şənbə günü yerli vaxtla günorta radələrində ABŞ-ın iki “B-1B” strateji bombardmançısının son günündə manevrlərində iştirak edəcəyi məlum olub. Onlar Quam adasından gəlib və Cənubi Koreyaya məxsus dörd “F-35A” qırıcısı və ABŞ-ın 4 “F-16” təyyarəsi ilə birlikdə Koreya yarımadası üzərindən uçublar.

Koreya Respublikası Silahlı Qüvvələrinin Qərargah Rəisləri Komitəsi bu səsdən sürətli bombardmançıların 2017-ci ildən bəri ilk dəfə Koreya yarımadasında istifadə edildiyini vurğulayıb.