Çay, yoxsa qəhvə? – Bu içki qadınların sümüyünə mənfi təsir göstərir

Gündəlik çay və qəhvə seçimi yaşlı qadınlarda sümük sağlamlığına nəzərəçarpacaq təsir göstərə bilər.

News24.az-ın xəbərinə görə, “ScienceAlert” yazır ki, osteoporoz 50 yaşdan yuxarı qadınlar arasında ən geniş yayılmış problemlərdən biri olaraq qalır. Mütəxəssislərin hesablamalarına görə, hər üç qadından biri bu xəstəliklə qarşılaşır.

Xəstəlik sümük toxumasının dağılması və bərpası arasındakı balansın pozulması nəticəsində yaranır. Bu isə sümüklərin kövrəkləşməsinə və qırılmalara daha həssas olmasına səbəb olur. Risk xüsusilə menopauzadan sonra artır, çünki bu dövrdə sümüklərin möhkəmliyində mühüm rol oynayan estrogen hormonunun səviyyəsi azalır.

“Nutrients” jurnalında dərc olunan araşdırma çərçivəsində Avstraliyanın Flinders Universitetinin alimləri ABŞ-da yaşı 65-dən yuxarı olan təxminən 9700 qadının məlumatlarını araşdırıblar. Təxminən 10 il ərzində iştirakçılar içki vərdişləri barədə məlumat verib və sümük mineral sıxlığını müəyyən etmək üçün müayinələrdən keçiblər.

Nəticələr göstərib ki, müntəzəm çay içən qadınlarda bud nahiyəsində sümük sıxlığı bir qədər daha yüksək olub. Alimlər bunu çayın tərkibində olan və sümük əmələ gətirən hüceyrələri stimullaşdıra bilən katexinlərlə əlaqələndirirlər. Xüsusilə artıq çəkili qadınlarda bu təsir daha güclü müşahidə olunub.

Qəhvə ilə bağlı vəziyyət isə daha mürəkkəbdir. Gündə beş fincandan çox qəhvə içən qadınlarda sümük sıxlığının daha aşağı olduğu müşahidə edilib. Bu, kofeinin kalsiumun mənimsənilməsinə mane ola biləcəyini göstərən əvvəlki nəticələri də təsdiqləyir.

Bundan əlavə, həyat boyu çox miqdarda alkoqol qəbul edən qadınlarda qəhvə istehlakı ilə sümük sıxlığının azalması arasında əlaqə də aşkarlanıb. Bu isə bu faktorların birlikdə mənfi təsirinin güclənə biləcəyini göstərir.