Gecə yata bilməyənlər üçün 6 sadə sirr: hər gün bunları edin

Yaş artdıqca daha çox yuxuya ehtiyac duyuruq, lakin yuxunun faydasına kifayət qədər önəm vermirik. Halbuki son araşdırmalar göstərir ki, yuxusuzluq səhiyyə sahəsində növbəti ciddi böhrana çevrilə bilər. Problem ondadır ki, daha çox istirahətə ehtiyacımız olduğunu anladığımız halda belə, bunu təmin etmək həmişə asan olmur.

News24.az xəbər verir ki, “Your Tango” nəşrinin yazdığına görə, bəzən insan saat 22:00-da yatağına uzansa da, yuxuya gedə bilmir. Bunun əvəzinə serial izləyir və ya telefonda vaxt keçirərək gecə saatlarınadək oyaq qalır.

Bununla belə, vəziyyəti düzəltmək mümkündür. Xüsusilə 50 yaşdan sonra yuxu problemi yaşayanlar üçün bu 6 sadə məsləhət səhər həqiqətən dinc oyanmağa kömək edə bilər:

1. Hər gün ən azı 20 dəqiqə günəş işığında olun
Gün ərzində işıq almaq orqanizmin yuxu və oyaqlıq ritmini tənzimləməyə kömək edir. Təbii günəş işığı yuxu hormonunun – melatoninin ifrazını tənzimləyir. Bu da yuxu dövrünün normallaşmasına səbəb olur.

2. Axşam saatlarında maye qəbulunu azaldın
Gün ərzində su içmək vacibdir, amma gec saatlarda maye qəbulu yuxunu poza bilər. Yatmazdan əvvəl su içmək gecə oyanmalarına səbəb olur və yuxunun keyfiyyətini aşağı salır.

3. Yatmazdan ən azı 2 saat əvvəl işıq təsirini azaldın
Telefon, televizor və kompüter ekranları yuxuya getməyə mane olan işıq yayır. Bunun əvəzinə kitab oxumaq, sakit musiqi dinləmək və ya nəfəs məşqləri etmək tövsiyə olunur.

4. Maqneziumla zəngin qidalar qəbul edin
Maqnezium orqanizmin bioloji saatını tənzimləyir, əzələləri və beyni rahatlaşdırır. Badam, keşyu, balqabaq tumu, yaşıl yarpaqlı tərəvəzlər, avokado və banan bu baxımdan faydalıdır.

5. Kortizol səviyyəsini aşağı saxlayın
Stress hormonu olan kortizolun yüksək olması yuxuya getməyə mane olur. Bu səbəbdən yatmazdan əvvəl xəbər izləməkdən, mübahisələrdən və gərgin mövzulardan uzaq durmaq tövsiyə edilir.

6. Günorta qısa yuxu edin, amma 20 dəqiqədən çox yox
Qısa günorta yuxusu yaddaşı və düşünmə sürətini yaxşılaşdırır. Lakin 20 dəqiqədən artıq yatmaq oyanarkən yorğunluq hissi yarada bilər.