Gənə dişləməsindən sonra infeksiyaya yoluxmanın əlamətləri açıqlandı

Gənə dişləməsindən sonra səpkilər, hərarətin yüksəlməsi, yorğunluq, əzələ və ya oynaq ağrıları Laym xəstəliyi də daxil olmaqla müxtəlif infeksiyalara yoluxmaya işarə edə bilər.

News24.az xəbər verir ki, bu barədə amerikalı infeksionist Tomas Russo bildirib.

O qeyd edib ki, Laym xəstəliyi gənə dişləməsi vasitəsilə keçən bakterial infeksiyadır. Vaxtında müalicə olunmadıqda bu xəstəlik oynaqlara, sinir sisteminə və ürək-damar sisteminə zərər verə bilər.

Mütəxəssisin sözlərinə görə, gənə dişləməsindən sonra insan təxminən 30 gün öz vəziyyətini müşahidə etməlidir.

Bu müddətdə infeksiyanın əlamətləri ortaya çıxa bilər. Ən xarakterik əlamət isə dişləmə yerindən kənara doğru genişlənən dəri səpkisidir.

“Həmin səpki adətən tədricən böyüyən ləkə formasında olur. Bundan əlavə, qızdırma, güclü halsızlıq, baş ağrısı, əzələ ağrıları, həmçinin, oynaqlarda şişkinlik və ağrı da mümkündür”, – deyə həkim qeyd edib.

Həkim daha az bilinən bir əlamətə də diqqət çəkib. Bu, qəfil qida allergiyasının yaranmasıdır. Xüsusilə, gənə dişləməsindən sonra bəzi insanlarda qırmızı ət və süd məhsullarına qarşı dözümsüzlük yarana bilər. Bu, gənə vasitəsilə orqanizmə daxil olan müəyyən karbohidratlara qarşı immun reaksiyalarla əlaqəli nadir, lakin təhlükəli “alfa-gal sindromu”nun inkişafına işarə edə bilər.

Russo vurğulayıb ki, bu cür simptomlar nəzərə alınmamalıdır. Onlar ortaya çıxarsa, mümkün qədər tez həkimə müraciət etmək və diaqnostik müayinədən keçmək tövsiyə olunur, çünki infeksiyanın erkən aşkarlanması fəsad riskini xeyli azaldır. /Prevention/