Hər gün sarımsaq yesəniz nə baş verər? – Gizli təsirləri açıqlandı

Kəskin və özünəməxsus dadı ilə seçilən sarımsaq bir çox yeməklərin ayrılmaz hissəsinə çevrilib. Üstəlik, orqanizm üçün faydalı maddələrlə zəngindir.

News24.az xəbər verir ki, dietoloqlar sarımsağın gündəlik istifadəsinin orqanizmə təsirlərini və optimal miqdarını açıqlayıblar.

Mütəxəssislərin sözlərinə görə, sarımsağın gündəlik qəbulu ümumi sağlamlığa müsbət təsir göstərə bilər. O, iltihabı azaltmağa, oksidləşdirici stresslə mübarizə aparmağa və immun sistemini gücləndirməyə kömək edir. Bundan əlavə, sarımsaq antioksidantlar və prebiyotiklərlə zəngindir ki, bu da ürək, beyin və bağırsaq sağlamlığı üçün faydalıdır.

Dietoloqlar bildirir ki, sarımsağın tərkibində olan allisin adlı maddə iltihab yaradan molekulları bloklayır. Xroniki iltihab isə ürək-damar xəstəlikləri, xərçəng və artritlə əlaqələndirilir.

Eyni zamanda sarımsaq güclü antioksidant kimi çıxış edir. Mütəxəssislər məsləhət görür ki, sarımsağı doğrayıb 5-10 dəqiqə gözlətmək lazımdır – bu zaman allisin daha aktiv olur.

Sarımsaq bağırsaq sağlamlığını da dəstəkləyir. O, faydalı bakteriyalar üçün qida rolunu oynayaraq mikrobiom balansını yaxşılaşdırır və bağırsaq divarını qoruyur.

Bundan başqa, sarımsağın beyin fəaliyyətinə də müsbət təsiri olduğu bildirilir. O, iltihabı azaldaraq yaddaş və düşünmə qabiliyyətini dəstəkləyir.

Ürək sağlamlığı baxımından da sarımsaq faydalıdır. Mütəxəssislərin fikrincə, o, xolesterin və trigliseridlərin səviyyəsini azaltmağa kömək edir.

Gündə nə qədər sarımsaq yemək lazımdır?

Dietoloqlar gündə 1-2 diş sarımsağın kifayət etdiyini bildirir. Onu həm çiy, həm də yeməklərə əlavə edərək istifadə etmək mümkündür.

Bununla belə, həddindən artıq istifadə tövsiyə edilmir. Çox miqdarda sarımsaq mədə narahatlığı, bağırsaq qıcıqlanması və xoşagəlməz qoxuya səbəb ola bilər. Həmçinin bəzi dərmanlarla qarşılıqlı təsir göstərə bilər.

Ekspertlər xəbərdarlıq edir ki, aşağı təzyiqi olanlar, qan laxtalanması problemi yaşayanlar, sarımsağa allergiyası olanlar və FODMAP pəhrizi saxlayan şəxslər onun istifadəsini məhdudlaşdırmalıdır.

Sarımsağı rasiona daxil etməyin ən yaxşı yolu isə onu yeməklərə ədviyyə kimi əlavə etməkdir. O, şorbalar, tərəvəz yeməkləri, souslar və müxtəlif qəlyanaltılar üçün ideal seçim hesab olunur.