Hər kəs alaq sayır, amma faydası təəccübləndirir – bu bitki orqanizmi necə dəyişir?

Bir çox insan pıtrağı adi alaq otu hesab edir. Halbuki bu bitki uzun illərdir təbii tibdə və kosmetologiyada istifadə olunan qiymətli müalicəvi vasitədir.

News24.az xəbər verir ki, bu bitkinin xüsusilə kökü daha faydalıdır. O, inulin, lif, antioksidant birləşmələr, üzvi turşular, efir yağları, fitosterollar və mineral duzlarla zəngindir.

Pıtraq kökü adətən dəmləmə, ekstrakt, şirə və ya yağ formasında istifadə olunur. Bitki sidikqovucu və tərlədici xüsusiyyətlərə malikdir və orqanizmi zərərli maddələrdən təmizləmək üçün tətbiq edilir.

Bağırsaqlara təsiri
Pıtraq tərkibindəki inulin sayəsində təbii prebiotik hesab olunur. Bu maddə bağırsaq mikroflorasını dəstəkləyir və həzmi yaxşılaşdırır. Bitkinin həmçinin antibakterial və göbələk əleyhinə təsiri olduğu bildirilir.

Xalq təbabətində pıtraq maddələr mübadiləsi pozğunluqları, həzm problemləri, dəri xəstəlikləri, seboreya, akne, psoriaz və qaşınma zamanı istifadə olunur.

Qaraciyərə təsiri
Təmizləyici xüsusiyyətləri sayəsində bu bitki detoks proseslərini dəstəkləyir və zərərli maddələrin bədəndən çıxarılmasına kömək edir. O, öd ifrazını artırır, həzmi yaxşılaşdırır və qaraciyər hüceyrələrinin bərpasını stimullaşdırır.

Dəri və saç üçün faydası
Pıtraq kosmetikada geniş istifadə olunur. Xüsusilə zəif, cansız, yağlı və tökülməyə meyilli saçlar üçün nəzərdə tutulan məhsullarda yer alır.

Pıtraq tərkibli şampunlar və losyonlar saç köklərini gücləndirə, seboreyanı azalda və baş dərisinin vəziyyətini yaxşılaşdıra bilər.

Bitki həmçinin yağlı və akneli dəri üçün kosmetik vasitələrin tərkibində olur. O, piy vəzilərinin fəaliyyətini tənzimləyir, dərinin yağlanmasını azaldır və sağalmanı sürətləndirir.

Kimlər ehtiyatlı olmalıdır?
Pıtraq hamilə və süd verən qadınlara, uşaqlara, eləcə də allergiyası olan şəxslərə tövsiyə edilmir.

Bundan əlavə, şəkərsalıcı və ya qan durulaşdırıcı dərman qəbul edən şəxslər də bu bitkidən istifadə edərkən ehtiyatlı olmalıdır.