Bakı ilk dəfə Sprint yarışına ev sahibliyi edəcək

Formula 1 yeni mövsümün Sprint yarışlarını açıqlayıb. Ötən il keçirilmiş üç Sprint yarışının sayı ikiqat artaraq, 2023-cü il mövsümündə altıya çatdı.

News24.az xəbər verir ki, təqvimin ilk Sprint yarışı Formula 1 Azərbaycan Qran Prisi çərçivəsində Bakıda baş tutacaq.

Sprint yarışları ötmələrin və yüksək sürətli həmlələrin əlverişli olduğu treklərdə keçirilir və xüsusi dramatikliyi ilə yadda qalaraq  geniş azarkeş auditoriyası cəlb edir. Təsadüfi deyil ki, ən sürətli şəhər yarışlarından hesab olunan Bakı yarışı da bu sıradadır.

Formula 1 Qrupunun İdarə Heyətinin sədri və prezidenti Stefano Domenikali növbəti Sprint yarışları ilə bağlı fikirlərini paylaşıb: “Biz F1 Sprint yarışının keçirildiyi son iki il ərzində azarkeşlərdən çox müsbət rəy almışıq.  Növbəti mövsümdə 6 Sprint yarışı keçirməyi səbirsizliklə gözləyirik.  Bu yarışlar üç gündən ibarət yarış həftəsonunun daha rəqabətli keçməsinə şərait yaradır, avtoidman həvəskarlarına daha çox həyəcan yaşadır. Həmçinin, inanıram ki, Sprint formatı əsas tərəfdaşlarımıza - Formula 1 komandalarına, yayımçılara və yarışa ev sahibliyi edən ölkələrə əlavə dəyər qatacaqdır.”

2023-cü il mövsümündə baş tutacaq Sprint yarışlarının təqvimi  aşağıdakı kimidir:

-        Formula 1 Azərbaycan Qran Prisi (28-30 aprel)

-        Formula 1 Avstriya Qran Prisi (30 iyun-2 iyul)

-        Formula 1 Belçika Qran Prisi (28-30 iyul)

-        Formula 1 Qətər Qran Prisi (6-8 oktyabr)

-        Formula 1 ABŞ Qran Prisi (20-22 oktyabr)

-        Formula 1 Braziliya Qran Prisi (3-5 noyabr)

 Qeyd edək ki, Sprint yarışı cümə günü keçirilən sıralanma turunun nəticələrinə əsasən, şənbə günləri baş tutur. Buna müvafiq olaraq, Bakıdakı Sprint yarışı şənbə günü, 29 aprel tarixinə təsadüf edəcək.