Sərhəddə toqquşma: danışıqlar çətinləşir - Rusiyadan REAKSİYA

“Bizim vəziyyətimizdə hamı başa düşür ki, Azərbaycan və Ermənistan arasında sülhə alternativ yoxdur və sülhə nail olmağın ən yaxşı yolu insanların sülh yolu ilə qarşılıqlı əlaqədə olması üçün ümumi yol imkanlarının açılmasıdır. Belə olsa, normal həyat, ticarət əlaqələri yaranacaq və getdikcə köhnə narazılıqlar arxa plana keçəcək. Baş nazirin müavinlərindən ibarət üçtərəfli işçi qrupumuz özünəməxsus münasibətlər formatı işləyib hazırlayıb. Eyni böyük ölkədən olmağımız, eyni dərsliklərlə oxumağımız, eyni filmlərə baxmağımız, eyni yumoru başa düşməyimiz və buna görə də insan səviyyəsində ortaq dil tapmağımız çox kömək edir”. 

News24.az xəbər verir ki, bunu Rusiya baş nazirinin müavini Aleksey Overçuk Sankt-Peterburqda keçirilən Beynəlxalq İqtisadi Forum çərçivəsində TASS-a müsahibəsində deyib.

Overçuk qeyd edib ki, Ermənistan və Azərbaycan sərhədində hələ də toqquşmalar var, insanlar ölür, belə bir şəraitdə nəqliyyat əlaqələrinin qurulması ilə bağlı danışıqlar aparmaq çətindir.



Kommunikasiyaların blokdan çıxarılması məsələsinə gəlincə, Baş nazirin müavini bildirib ki, bununla bağlı dəqiq cavab yoxdur: “Bu suala hələ heç kim dəqiq cavab verməyəcək: nə vaxt razılaşırıq və nə vaxt müvafiq sənəd imzalanacaq. Onda sovet dövründə mövcud olan və həm ermənilərin, həm də azərbaycanlıların istifadə etdiyi bu dəmir yolunun bərpasına başlamaqdan danışmaq olar. Ermənistan üçün bu dəmir yolunun açılması bu ölkənin blokunun açılması baxımından əsas əhəmiyyət kəsb edir. Azərbaycan rəhbərliyi də ölkənin qərb rayonları ilə Naxçıvan arasında ən qısa zamanda birbaşa və rahat nəqliyyat əlaqəsi yaratmağa çalışır. Bundan əlavə, dəmir yolunun İran və Türkiyəyə daha da uzanacağı göz qabağındadır ki, bu da onu Avrasiyanın ən mühüm nəqliyyat marşrutlarından birinə çevirəcək”.

Akqabay