Yeni maddi-mədəni nümunələr aşkar olundu - FOTO

Cəlilabad rayonunun Çəmənli kəndi ərazisində yerləşən Xudutəpə abidəsində arxeoloji qazıntılar aparılır.

News24.az APA-ya istinadən xəbər verir ki, qazıntılar Arxeologiya, Etnoqrafiya və Antropologiya İnstitutunun aparıcı elmi işçisi, tarix üzrə fəlsəfə doktoru, dosent arxeoloq Anar Ağalarzadənin rəhbərliyi altında aparılır.

A. Ağalarzadənin sözlərinə görə, qazıntı işləri hazırda ilkin mərhələdədir: "Bu ilki qazıntılar yaşayış məskənində davam etdirilir. Çoxtəbəqəli olan bu abidənin üst qatında orta əsrlərə aid zəngin maddi mədəniyyət qalıqları üzə çıxır. Qazıntılar zamanı şirli və şirsiz saxsı məmulatı, ocaq yerləri, təndir qalıqları tapılıb. Qazıntılardan aşkarlanan 1 ədəd mis sikkə maraq doğurmaqla yanaşı abidənin orta əsrlər təbəqəsinin dəqiq tarixini müəyyən etməyə imkan verir. Tədqiqatlara görə sikkə Hülakülərin 9-cu hökmdarı Sultan Əbu Səid Bahadur (1305-1335) xanın adına kəsilmiş puldur.

Hazırda abidədə arxeoloji qazıntılar dərin qatlara doğru davam etdirilir.