ABŞ İrandan narahatdır: "genişmiqyaslı münaqişə..."

“Bizə bilirik ki, İran bu prosesləri diqqətlə izləyir və Birləşmiş Ştatların Yaxın Şərqdəki hərbi bazalarına hücumlarını fəal şəkildə dəstəkləyir. ABŞ regionda daha genişmiqyaslı münaqişə ehtimalından narahatdır”.

News24.az xəbər verir ki, bu barədə ABŞ Milli Təhlükəsizlik Şurasının sözçüsü Con Kirbi bildirib.

Kirbi əlavə təfərrüatlar vermədən İranın silahlı qruplaşmaları raket, sursat və digər resurslarla təmin etdiyini deyib.

Qəzzada İsrail-HƏMAS toqquşmasının başlamasından sonra İranın dəstəklədiyi terrorçu qruplaşmaların bölgədə fəallığı artıb.

İran uzun müddətdir “Hizbullah”, “Həşd əş-Şabi” və HƏMAS da daxil olmaqla, bölgədəki çoxsaylı silahlı və terrorçu qruplaşmaları dəstəkləyir. Artıq Bayden administrasiyası Suriya və İraqda ABŞ qüvvələrinə hücumların artması barədə xəbərdarlıq edib.

“İslam Müqaviməti” Hərəkatı Suriyanın Ət-Tanf, Əl-Malikiyyə və Əl-Rukban bölgələrindəki Amerika bazalarına hücuma görə məsuliyyəti öz üzərinə götürüb. Həmçinin oktyabrın 23-də Suriyanın Əş-Şədadi bölgəsindəki Amerika bazasına PUA hücumu barədə məlumat yayılıb.

Ayşən