İran ballistik raket iddiasını rədd edir

İran Ukraynadakı müharibədə istifadə etmək üçün Rusiyaya ballistik raketlər göndərdiyinə dair iddiaları təkzib edib.

News24.az xəbər verir ki, İranın BMT-dəki (BMT) Daimi Nümayəndəliyi X sosial media platformasında “Reuters” xəbər agentliyinin “İran Rusiyaya ballistik raketlər verir” iddiasına cavab verib.

“Ballistik raketlərin satışı ilə bağlı heç bir hüquqi məhdudiyyət olmasa da, İran mənəvi cəhətdən Rusiya-Ukrayna münaqişəsi zamanı müharibənin alovlanmaması üçün silah ticarətindən çəkinməyə borcludur və bu, İranın beynəlxalq hüquqa, BMT Nizamnaməsinə sadiqliyi ilə bağlıdır” ifadələrdən istifadə edilib.

Qeyd edək ki, Reuters agentliyinin 21 fevral tarixli xəbərində adı açıqlanmayan İran rəsmilərinə əsaslanaraq, İranın Rusiyaya təxminən 400 ballistik raket tədarük etdiyi iddia edilib.

ABŞ Ağ Evin Milli Təhlükəsizlik Kommunikasiyalar üzrə müşaviri Con Kirbi mövzu ilə bağlı verdiyi açıqlamada iddianı təsdiq edə bilməyəcəklərini, lakin İranın Rusiyaya mümkün ballistik raket tədarükünə "beynəlxalq ictimaiyyətin reaksiyasının sürətli və sərt olacağını" bildirib.

Günel Məlikzadə