Şimali Koreya təlim keçirdi

Şimali Koreyanın rəsmi Koreya Mərkəzi Xəbər Agentliyinin (KCNA) xəbərinə görə, ölkə lideri Kim Çen Inın nəzarəti altında düşmən hədəflərinə nüvə əks-hücumunun ssenariləşdirildiyi təlim keçirilib.

News24.az xəbər verir ki, təlimdə nüvə başlıqları daşıya bilən iri 600 millimetrlik çoxsaylı reaktiv yaylım atəşi qurğuları sınaqdan keçirilib. 352 kilometr uzaqlıqdakı ada uğurla vurulub.

Təlim Şimali Koreyanın bütün nüvə qüvvələrinin komandanlıq, idarəetmə, nəzarət və əməliyyat sisteminin etibarlılığını təsdiqləyib.

Şimali Koreya lideri Kim təlimdən məmnun olduğunu vurğulayıb və bildirib ki, çoxlu raket buraxılış qurğuları snayper tüfəngləri qədər dəqiqdir.

Kim qeyd edib ki, təlim Şimali Koreyanın nüvə gücünün hər an və qəfil vəziyyətlərdə müharibənin qarşısını almaq və müharibədə təşəbbüsü ələ keçirmək kimi vəzifələrini tez, dəqiq şəkildə yerinə yetirməyə hazır olması üçün vacibdir.

Günel Məlikzadə