Elinanın oxuduğu məktəb üçüncü oldu

“Məktəblinin dostu” layihəsi çərçivəsində ümummilli lider Heydər Əliyevin 96 illik yubileyi münasibətilə “Nə? Harada? Nə zaman” intellektual oyunu üzrə məktəblilər arasında çempionat keçirilib.



Bakı şəhər Təhsil İdarəsindən News24.az-a verilən məlumata görə, çempionatın keçirilməsində məqsəd şagirdlərin intellektual səviyyəsini, dünyagörüşünü artırmaq, zehni inkişafını gücləndirmək, eləcə də asudə vaxtlarını səmərəli təşkil etməkdən ibarətdir.

“Pullman Baku” otelində keçirilən çempionatda Bakı Şəhəri üzrə Təhsil İdarəsinin (BŞTİ) müdir müavini Nərgiz Səfərova, “Məktəblinin dostu” layihəsinin rəhbəri Rüstəm Ağayev,“Nə? Harada? Nə zaman” televiziya klubunun üzvləri Rauf Nəcəfli və Əziz Mürşüdlü iştirak ediblər.

Tədbirdə çıxış edən BŞTİ-nin müdir müavini Nərgiz Səfərova komandalara uğurlar arzulayıb və bu cür intellektual yarışların keçirilməsinin vacibliyindən söz açıb.

Çempionatda “Məktəblinin dostu” layihəsinin tətbiq edildiyi 35 məktəbin VIII, IX, X sinif şagirdləri mübarizə aparıb. Komandalar 5 üzv və 1 kapitan olmaqla 6 nəfərdən ibarət olub.

Yarış iki hissədən ibarət təşkil edilib. Hər hissədə komandalara 12 sual verilib.

Nəticələrə əsasən, 12 nömrəli tam orta məktəbin komandası I yerə, 45 nömrəli tam orta məktəbin komandası II yerə, 162  nömrəli tam orta məktəbin komandası isə III yerə layiq görülüb.

Sonda I, II, III yerlərin qaliblərinə diplom, medal, kubok və hədiyyələr təqdim olunub.