Cənubi Koreyadan Şimala xəbərdarlıq atəşi

Şimali Koreya-Cənubi Koreya sərhədində gərginlik yenidən artıb.

News24.az xəbər verir ki, Cənubi Koreya Baş Qərargahının (JCS) verdiyi açıqlamada, dünən bir qrup Şimali Koreya əsgərinin Demilitarizasiya Bölgəsi (DMZ) daxilində yerləşən Hərbi Demarkasiya Xəttini (MDL) keçərək Koreyalararası quru sərhədini pozduğu bildirilib. 

Qeyd edilib ki, Cənubi Koreya ordusu lazımi xəbərdarlıqları etdikdən sonra onların qarşısını almaq üçün üçün xəbərdarlıq atəşi açıb.

Şimali Koreya əsgərlərinin qısa müddət sonra öz ölkələrinin sərhədlərinə qayıtdığı bildirilib. Rəsmilər, hadisənin "təsadüfən" baş verdiyini və Şimali Koreya əsgərlərinin öz sərhədlərinə qayıtdıqdan sonra gecə boyu sərhəd xəttində işləməyə davam etdiklərini bildiriblər. Son inkişafla Şimali Koreyanın son iki həftədə törətdiyi sərhəd pozuntularının sayı 3-ə yüksəlib.

Xatırladaq ki, Şimali Koreya əsgərləri iyunun 9-u və 18-i quru sərhədini keçiblər və Cənubi Koreya ordusu xəbərdarlıq atəşi açıb. Bildirilib ki, Şimali Koreya əsgərləri qısamüddətli pozuntulardan sonra sərhədlərinə çəkiliblər.

Günel Məlikzadə