Almaniya onları deportasiya edəcək

Almaniyada hökumət cinayət törətmiş əcnəbilərin deportasiyasını sürətləndirmək üçün qanun layihəsini qəbul edib.

News24.az xəbər verir ki, qanun layihəsini hazırlayan Daxili İşlər Naziri Nensi Faeser verdiyi açıqlamada internet üzərindən törədilən nifrət cinayətlərinə qarşı sərt tədbirlər gördüklərini ifadə edərək, "Almaniya vətəndaşı olmayan və burada terror aktlarını tərifləyən hər kəs deportasiya edilməlidir" dedi.

Müvafiq olaraq, ağır cinayət törədənlərlə yanaşı, sosial şəbəkələrdə terroru tərifləyən məzmun hazırlayıb yayanlar və bu cür məzmunu “like” işarəsi ilə qeyd edənlər də təqsirli sayılıb, deportasiya oluna bilərlər.

Terror cinayətlərinə göz yuman, dözən və ya tərifləyən əcnəbilər daha asan deportasiya ediləcəklər.

Baş nazirin müavini və İqtisadiyyat Naziri Robert Habeck, "terrorizmi alqışlayaraq, onun hərəkətlərini qeyd edərək liberal əsas nizamı ələ salan hər kəsin qalmaq hüququnu itirəcəyini" vurğulayaraq, "Ona görə də indi yaşayış hüququ buna uyğun olaraq dəyişdirilir" dedi.

Almaniya kansleri Olaf Şolz mayın 31-də Mannheimdə bir polis məmurunun qətlindən sonra verdiyi açıqlamada deportasiya qaydasının dəyişdiriləcəyi mesajını verdi.

Günel Məlikzadə