"İlon Mask və Putin gizli görüşür" - KİV

Amerikanın Wall Street Journal (WSJ) qəzeti amerikalı milyarder İlon Maskın mütəmadi olaraq Rusiya prezidenti Vladimir Putinlə “gizli” əlaqə saxladığını iddia edib.

News24.az xəbər verir ki, Musk və Putinin "gizli" görüşləri ilə bağlı məlumatı olan şəxslər mövzu ilə bağlı WSJ-yə açıqlamalar verib. 

Mənbələr iddia edib ki, Mask və Putin bir çox mövzuda, o cümlədən geosiyasət, biznes və şəxsi məsələlərdə fikir mübadiləsi aparıblar.

Mask uzun müddətdir Putinlə görüşmədiyini bildirsə də, mənbələr ikisinin əlaqə saxladığını iddia edib. Mənbələr bildirib ki, Rusiya administrasiyası Maskdan 2023-cü ilin sonunda Tayvanda SpaceX-in Starlink peyk internet sistemini aktivləşdirməməyi tələb edib.

Xəbərə görə, hazırkı administrasiyadan bəzi səlahiyyətlilər, Maskın ABŞ-la bağlı “məxfi məlumatlara” çıxışı olduğu üçün bu təmasların təhlükəsizlik narahatlıqları yaratdığı fikrini bölüşüb.

İlon Mask isə Putinlə kosmosla bağlı yalnız bir dəfə görüşdüyünü və bunun 2021-ci ilin aprelində baş verdiyini açıqlayıb.

Məryəm İlhamqızı