Qonşumuzda kütləvi qiymət artımı gözlənilir

2025-ci ildə Rusiyada ərzaq qiymətləri yüksək inflyasiya, baza dərəcəsi, istehsal və nəqliyyat xərclərinin artması səbəbindən 8-20 faiz arta bilər. Məsələn, südün 15%-ə, meyvə-tərəvəzin 20%-ə qədər bahalaşması gözlənilir.

News24.az Axar.az-a istinadla xəbər verir ki, bu barədə Rusiya İxracatçılar və İdxalçılar Assosiasiyasının vitse-prezidenti, “Lex Alliance” hüquq firmasının idarəedici tərəfdaşı Artur Leyer deyib.

“Ət məhsulları da inflyasiyaya məruz qalır. Mal ətinin kiloqramı 700-800 rubla qədər (12% artım), donuz ətinin kiloqramı 500-600 rubla qədər (10% artım) arta bilər”, - ekspert bildirib.

Bundan əlavə, ekspertlər 2025-ci ildə təkcə ərzaq məhsullarına deyil, həm də geyim və ayaqqabılara münasibətdə qiymətlərin artacağını proqnozlaşdırırlar. İqtisadi vəziyyətin pisləşməsi və Rusiya Mərkəzi Bankının pul siyasətini sərtləşdirən yeni tədbirlər tətbiq etməsi fonunda qiymət artımı baş verəcək. Oxşar səbəblərdən xaricdən gətirilən malların da qiyməti artacaq.

2025-ci ildə mənzil-kommunal xidmətlər baxımından qanunla müəyyən edilmiş tariflərin yeni indeksləşdirilməsi gözlənilir. Bu da rusların ailə büdcəsində kommunal xərclərin payının artmasına səbəb olacaq. Soyuq və isti su təchizatı, istilik, qaz və elektrik enerjisi xidmətlərinin dəyəri təxminən 10-12% artacaq.

İctimai nəqliyyatda gediş haqqının da 7-10 faiz artacağı gözlənilir.