Trampın andiçmə mərasimində Azərbaycandan kim iştirak edəcək?

Yanvarın 6-da ABŞ Konqresi prezident seçkilərinin nəticələrini rəsmən təsdiq edib. Seçkilərin nəticələrinə görə, respublikaçıların namizədi Donald Tramp dövlət başçısı seçilib. O, 77,3 milyon xalq səsi ilə 312 seçici səsini qazanıb.

News24.az bildirir ki, Trampın inaqurasiya mərasimi yanvarın 20-də baş tutacaq. Qeyd edək ki, dünyanın bir çox ölkələrindən fərqli olaraq, ABŞ-da heç vaxt prezidentin andiçmə mərasiminə xarici liderləri dəvət etmək adəti olmayıb. Ağ Evin bir rəhbərindən digərinə hakimiyyətin ötürülməsi mərasimində həmişə bir çox səfir və diplomat iştirak edib.

Lakin Donald Tramp bu ənənəni dəyişmək qərarına gəlib. Qərb mətbuatında yayılan məlumata görə, andiçmə mərasiminə Çin lideri Si Cinpin, Salvador prezidenti Nayib Bukele, İtaliyanın baş naziri Giorgia Meloni və Argentina prezidenti Xavyer Mayli dəvət olunub. Dəvət olunanların siyahısı genişdir, ancaq bu siyahı açıqlanmayıb.

Maraqlıdır ki, Azərbaycandan inaqurasiyada kimlər iştirak edəcək?

Modern.az-ın məlumatına görə, bundan əvvəlki inaqurasiya mərasimlərində adətən Azərbaycanın bu ölkədəki səfirləri iştirak edib. 

Bu dəfə də ABŞ Prezidentinin inaqurasiya mərasmində ölkəmizin ABŞ-dəki fövqəladə və səlahiyyətli səfirinin iştirakı gözlənilir.

Qeyd edək ki, hazırda Azərbaycanın ABŞ-dakı səfiri Xəzər İbrahimdir. O, bu vəzifəyə 2021-ci ildə təyin edilib.