"ASAN"dan və Gənclər Fondundan UNİKAL LAYİHƏ

GəncLİK proqramı çox unikal layihədir. Gənclər Fondunun və "ASAN Xidmət"in birgə təşkilatçılığı ilə keçirilən bu layihəyə ümumilikdə 1000 iştirakçı müraciət edib. Onlardan 30-a yaxın gənc müxtəlif mərhələdən keçməklə bu proqram üçün seçilib".

News24.az xəbər verir ki, bunu “GəncLİK” (Gənc Liderlərin İnkişafı Konsepsiyası) Proqramının açılış mərasimində çıxışı zamanı
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev bildirib.
Onun sözlərinə görə, dövlətin gənclər siyasəti ilə bağlı çoxşaxəli islahatlar həyata keçirilir:

"Bu proqram da dövlətin gənclərə göstərdiyi növbəti diqqətin göstəricilərindən biridir. "ASAN Xidmət"in öz kollektivi də gənclərdən ibarətdir. Burada 20 mindən çox gənc könüllülük məktəbini keçib. Eyni zamanda gənclərimiz ayrı-ayrı dövlət orqanlarında müxtəlif təcrübələr keçirlər. Bu proqram isə müəyyən keyfiyyətlərə, kriteriyalara cavab verən gənclərimizin məqsədyönlü şəkildə təcrübə proqramından keçməsini ehtiva edir. Bu gənclər əvvəlcə test mərhələsindən, daha sonra video formatda müsahibədən keçiblər".

Ülvi Mehdiyev bildirib ki, Azərbaycanın gənclər siyasəti ilə məşğul olan ekspertlərinin, mütəxəssislərinin seçimi əsasında seçilən 30 gənc müxtəlif təlim və treninqlərə cəlb olunacaqlar:

"Eyni zamanda onlar ayrı-ayrı dövlət orqanlarında həmin orqanların rəhbərlərinin yanında xüsusi qaydada təcrübədən keçəcəklər. Bu gənclərin arasından daha peşəkar, təcrübəli olanları digər dövlət xidmətlərinə cəlb olunmaq üçün sonradan dövlət qulluğuna cəlb ediləcəklər"

Afaq Mirayiq