Rövnəq Abdullayev Belarusun Baş naziri ilə görüşüb

“Belarus Azərbaycan neftinin tədarükü ilə bağlı uzunmüddətli müqavilədə maraqlıdır”.

News24.az xəbər verir ki, bu sözləri Belarusun Baş naziri Sergey Rumas bu gün Azərbaycan Dövlət Neft Şirkətinin (SOCAR) prezidenti Rövnəq Abdullayevlə görüşdə bildirib.

“Biz nefti Odessa-Brodı-Mozır neft kəmərindən istifadə edərək Mozır neftayırma zavodunda emal etməyi planlaşdırırıq. İnanıram ki, SOCAR belə əməkdaşlıqda maraqlı olacaq”, - deyə Sergey Rumas qeyd edib.

Belarusun hökumət başçısı Belarus və SOCAR-ın uzun müddət neft bazarında çalışdıqlarını xatırladıb. 2011 və 2016-cı illərdə Belarus SOCAR-dan neft alıb, Azərbaycan tərəfi isə bu ölkədən neft məhsulları alır.

“Sirr deyil ki, Belarus neft tədarükünün şaxələndirilməsi üzərində işləyir, bundan əvvəl nefti bütünlüklə Rusiya Federasiyasından alırdıq. Əlbəttə ki, alternativ neft tədarükü olmadan bu gün Belarusun enerji təhlükəsizliyindən danışmaq olmaz.

Buna görə də bu sahədə uzunmüddətli müqavilələr bağlaya biləcəyiniz etibarlı tərəfdaşlar axtarmaq istəyirik. Təcrübə göstərir ki, SOCAR belə etibarlı tərəfdaş ola bilər”, - deyə Sergey Rumas vurğulayıb.
Bununla yanaşı, Baş nazir qeyd edib ki, Belarus tərəfi Rusiyadan neft tədarükünü istisna etmir:

“Bu mərhələdə Rusiya neftinin tədarükünü tamamilə istisna etmək niyyətində deyilik. Sadəcə, onları müəyyən bir səviyyədə saxlamaq məcburiyyətindəyik”.

Sergey Rumas əlavə edib ki, SOCAR mütəxəssisləri hazırda Mozır Neft Emalı Zavodunda tikinti-quraşdırma işləri aparırlar:

“Məmnuniyyətlə demək istəyirəm ki, “Belneftexim” və Mozır Neft Emalı Zavodunun rəhbərliyi tərəfindən verilən rəylər çox müsbətdir. Həqiqətən, sizin mütəxəssisləriniz bu çətin işi çox səmərəli şəkildə yerinə yetirirlər”.

Baş nazirin sözlərinə görə, SOCAR-ın inşaat sənayesində böyük təcrübəsini və Mozır Neft Emalı Zavodunda işləməsini nəzərə alaraq, Belarus tərəfi ölkədə digər böyük investisiya layihələrinin inşasında Azərbaycan şirkətinin yüksək ixtisaslı işçi qüvvəsindən yararlanmaqda maraqlıdır.

Hökumət başçısı bugünkü görüşün SOCAR və “Belneftexim” konsernləri arasında neft sənayesində ikitərəfli əlaqələrin gücləndirilməsi istiqamətində növbəti addım olacağına ümid etdiyini bildirib.

Görüşdə Baş nazirin müavini, neft sənayesinə rəhbərlik edən İqor Lyaşenko və “Belneftexim” konserninin sədri Andrey Rıbakov da iştirak edib.

Qeyd edək ki, SOCAR martın 5-6-da Türkiyənin Ceyhan limanından Belarusa ilk neft tankerini göndərəcək. Göndərilən neftin həcmi təqribən 85 min ton təşkil edəcək. Martın 20-də Gürcüstanın Supsa limanından təxminən 85 min ton həcmində ikinci tankerin göndərilməsi də planlaşdırılır.