Məktəblərdə kütləvi yoluxmalar olarsa QƏRAR DƏYİŞƏCƏK

"Xəzər rayonunda məktəbdə yoluxma olarsa, Qaradağ rayonunda məktəbi bağlamağa ehtiyac yoxdur".

News24.az-ın verdiyi xəbərə görə, bunu Təhsil naziri Emin Əmrullayev deyib. O bildirib ki, elan olunan qaydalar bugünkü planlardır: "Hər hansı bir məktəbdə kütləvi yoluxma halı olarsa, bağlanmalar lokal xarakterli olacaq. Xəzər rayonunda məktəbdə yoluxma olarsa, Qaradağ rayonunda məktəbi bağlamağa ehtiyac yoxdur. Biz qaydalara əməl etməliyik ki, normal həyata daha tez qayıdaq. Əgər yoluxmalar sürətli artarsa, məktəblərdə kütləvi yoluxma olarsa, uşaqlar məktəbdən evə virus aparıb nənə-babalarını yoluxdurarsa, həmin məktəbi tam və ya qismən bağlayıb distant təhsilə keçə bilərik".

E.Əmrullayev deyib ki, yoluxma halları müşahidə etmədiyimiz təqdirdə ənənəvi dərslər təşkil etmək mümkün olacaq: "Vaxtından əvvəl tələsik qərarlar vermək yerinə, düşünülmüş, düzgün qərarlar verməliyik".