Azərbaycanda dərman qıtlığının səbəbi... - Nazir müavini açıqladı

Dərman vasitələrinin ölkəmizdə qıtlığının bir çox səbəbləri var.

News24.az xəbər verir ki, bunu Milli Məclisin bu gün keçirilən iclasında “Dərman vasitələri haqqında” qanuna təklif edilən dəyişikliklərin müzakirəsi zamanı parlamentin səhiyyə nazirinin müavini Rasim İsmayılov deyib.

Nazir müavini bildirib ki, burada səbəblərin əsas ikisi mühüm əhəmiyyət kəsb edir:

“Bunlardan birincisi beynəlxalq bazarlarda baş verən qeyri-stabillikdir. Rusiya-Ukrayna arasında olan hərbi əməliyyatlar, enerji daşıyıcılarının bahalaşması və s bütün sahələrdə olduğu kimi dərman vasitələrinin istehsalına da mənfi təsirini göstərir. Bəzi hallarda istehsalçılar öz öhdəliklərini yerinə yetirməkdən imtina edir və ya gecikdirirlər. Son zamanlar dünya bazarında olan stabilləşmə bizə imkan verir ki, yerli idxalçılar etibarlı təchizat zəncirini təmin etsinlər. İkinci əsas məsələ hazırda qüvvədə olan qanunvericiliyin günün tələblərinə cavab verməməsidir. Hesab edirik ki, qanuna düzəlişlər qəbul olunarsa, qeydiyyat prosesi sadələşəcək və sürətlənəcək”.

Bundan başqa, Rasim Balayev qeyd edib ki, fiziki şəxs tərəfindən ehtiyacı olan dərman vasitəsinin gətirilməsinə hər hansı məhdudiyyət yoxdur. Xaricdə müalicə alan şəxs ölkəyə gələndə ehtiyacı olan dərmanları özü ilə gətirə bilər.

Onun sözlərinə görə, əksinə, qanuna dəyişiklikdə Azərbaycanda müalicə alan şəxslər üçün dövlət qeydiyyatında və satışda olmayan dərman vasitəsinin sifariş əsasında xaricdən gətirilməsinə şərait yaradılır.