Türkiyə Ərdoğan-Putin görüşü barədə BMT-yə məlumat verəcək

Türkiyə yaxın günlərdə Prezident Rəcəb Tayyib Ərdoğan və Rusiya lideri Vladimir Putin arasında Qara dəniz taxıl təşəbbüsünün bərpası ilə bağlı Soçidə aparılmış danışıqların nəticələri barədə BMT-yə məlumat verəcək. 

News24.az xəbər verir ki, bu barədə TASS-a yerli diplomatik mənbə məlumat verib.

“Yaxın günlərdə taxıl dəhlizinin bərpası ilə bağlı beynəlxalq təşkilatla birlikdə hazırlanan təkliflər paketi üzrə Türkiyənin BMT ilə təmaslarını gözləməliyik. Təşəbbüslərin xarakterini və həyata keçirilən tədbirləri nəzərə alsaq, bunlar, şübhəsiz ki, yüksək səviyyəli təmaslar olacaq” mənbə əlavə edib.

“Rusiya o mənada haqlıdır ki, şərtləri yerinə yetirilməyənə qədər sövdələşməyə qayıtmağın mənası yoxdur. Türkiyə bir tərəfdən qlobal ərzaq böhranının aradan qaldırılmasına yönəlmiş təşəbbüsü əldən vermək istəmir. Digər tərəfdən Ukraynadakı münaqişənin həlli üçün ilkin şərtlər yaradır”, - mənbə bildirib.

Eyni zamanda, o hesab edir ki, taxıl müqaviləsi ilə bağlı irəliləyiş əsasən Qərbdən asılı olacaq: “Qərb ölkələri Rusiyaya qarşı təcrid və embarqo məsələsində öz mövqelərinə yenidən baxmalıdırlar və BMT onları buna inandırmaq üçün daha qətiyyətli addımlar atmalıdır”.

Sentyabrın 4-də Putinlə danışıqlardan sonra Soçidə keçirilən mətbuat konfransında çıxış edən Ərdoğan bildirib ki, Ankara Qara dəniz taxıl təşəbbüsünü yenidən işə salmaq üçün yeni təşəbbüslər toplusu hazırlayıb və onun müsbət baxılacağına ümid edir. Putin də öz növbəsində bildirib ki, Moskva İstanbul müqavilələri çərçivəsində ona verilən vədlərin yerinə yetirildiyi tarixdən bir neçə gün ərzində taxıl sazişinə qayıtmağa hazırdır.

Akqabay