Yemək üçün hava limanına MEYMUN CƏSƏDİ GƏTİRDİ

Massaçusets ştatının Boston şəhərindəki Loqan Beynəlxalq Hava Limanında adi yoxlamalar zamanı gömrük əməkdaşları Konqo Demokratik Respublikasından (DRC) ABŞ-a gedən sərnişinin baqajında meymun qalıqları aşkar ediblər.

News24.az ABŞ Gömrük və Sərhəd Mühafizəsi tərəfindən dünən verilən açıqlamaya istinadən xəbər verir ki, xüsusi təlim keçmiş K9 iti Buddey sayəsində yanvarın 8-də baş verən hadisədə 4 meymunun qalıqlarının tapıldığı bildirilib.

Səlahiyyətlilər, şəxsiyyətini açıqlamadıqları sərnişinin DRC-yə getdikdən sonra Parisdə birləşdirici reysi ilə ABŞ-a qayıtdığını bildirib.

Bildirilib ki, sərnişin çamadanında qurudulmuş balıq olduğunu deyib, lakin sonradan aparılan müayinələr nəticəsində ümumi çəkisi 4 kiloqram olan meymun cəsədi aşkar edilib.

ABŞ Gömrük və Sərhəd Mühafizəsinin sözçüsü Rayan Bissette bildirib ki, sərnişin daha sonra meymunları yemək üçün özü ilə apardığını deyib. 

Bissette vəhşi heyvan ətinin Ebola kimi epidemik xəstəliklərə səbəb ola biləcəyi üçün ölkəyə girişinin qadağan edildiyini xatırladaraq, meymun cəsədlərinin ABŞ Xəstəliklərə Nəzarət və Qarşısının Alınması Mərkəzləri tərəfindən məhv ediləcəyini bildirib.

Qurum rəsmisi bildirib ki, sərnişinlə bağlı heç bir hüquqi tədbir başlanmayıb.

Günel Məlikzadə