İlon Mask 100 min çip aldı

İlon Mask yeni süni intellekt təşəbbüsü xAI üçün 100 min çip alır. 

News24.az xəbər verir ki, Mask keçən yay qurduğu xAI üçün 6 milyard dollar vəsait topladığını açıqlayıb. Bəs, bu böyük büdcə nəyə xərclənəcək? 

Toplanan bu 6 milyard dollar xAI şirkətinin ilk məhsullarını bazara çıxarmaq, qabaqcıl infrastruktur yaratmaq və gələcək texnologiyaların tədqiqat, inkişafını sürətləndirmək üçün istifadə olunacaq. İndiyə qədər xAI OpenAI-nin ChatGPT-yə rəqib olaraq hazırladığı Grok adlı chatbot təqdim edib. Grok hazırda yalnız X Premium abunəçiləri üçün əlçatandır.

Bu maliyyələşdirmə raundunda Andreessen Horowitz, Sequoia Capital və Səudiyyə Ərəbistanı şahzadəsi Al Waleed bin Talal kimi nəhəng investorlar iştirak ediblər. Keçən il xAI, 1 milyard dollara qədər kapital investisiyası axtardığını açıqlayıb. Bununla belə, bir neçə ay əvvəl The Financial Times xəbər verib ki, xAI 6 milyard dollar istəyir və Musk həmin vaxt bu xəbəri təkzib edib. İndi görürük ki, faktiki olaraq 6 milyard dollar yığılıb.

Qeyd edək ki, süni intellektin inkişafı ucuz başa gəlmir. Nvidia-nın qarşıdan gələn Blackwell B200 AI qrafik kartlarının hər biri 30 min ilə 40 min dollar arasında dəyişir. Keçən həftə verilən hesabata görə, xAI Grok AI chatbotunun təkmilləşdirilmiş versiyasını gücləndirmək üçün Nvidia-nın 100.000 mövcud H100 çipini tələb edəcək. Mask investorlara yeni məlumat mərkəzini 2025-ci ilin payızında işə salmağı planlaşdırdıqlarını söyləyib.

Onu da bildirək ki, AI çipləri, istedad və texnologiya yarışı heç vaxt bu qədər rəqabətli olmayıb. Google, Apple, Amazon, Microsoft və Meta kimi böyük texnologiya nəhəngləri süni intellekt layihələrinə milyardlarla dollar xərcləyir. “Microsoft” şirkəti “OpenAI” şirkəti ilə çoxmilyardlı tərəfdaşlıq qurub. OpenAI-nin baş direktoru Sam Altman qlobal çip sənayesini yeniləmək üçün trilyonlarla dollar axtarır. Mask isə bəşəriyyətə fayda vermək missiyasından yayındığını iddia edərək OpenAI-ni məhkəməyə verir.

Mask, süni intellekt və robototexnika ilə bağlı Tesla-dan başqa məhsullar hazırlamağa üstünlük verəcəyini bildirib. Tesla səhmdarları Maskın 56 milyard dollarlıq maaş paketini geri qaytarıb-qaytarmayacağına səs verəcəklər. İllik iclas iyunun 13-də keçiriləcək.

İlon Mask yenidən böyük oynayır. 

Günel Məlikzadə