Azərbaycanda 5 nəfərin ölümünə səbəb olan şəxsdən MÜRACİƏT

Lənkəranda 5 nəfərin ölümünə səbəbə olan qəzaya görə tutulmuş sürücü Ali Məhkəməyə müraciət edib.  

News24.az-ın məlumatına görə, Cinayət Məcəlləsinin 263.3-cü, yəni 2 və daha artıq şəxsin ölümünə səbəb olan yol-nəqliyyat hadisəsi törətmə maddəsi ilə ittiham edilərək məhkum olunmuş Aslanov Eldar Zeynal oğlu Ali Məhkəmədən işin yenidən araşdırılmasını və barəsindəki hökmün dəyişdirilməsini xahiş edib.

Müraciətə hakim Şahin Yusofovun sədrliyi ilə baxılacaq.

Qeyd edək ki, 2016-cı ilin sentyabrında Lənkəran rayonunun Boladi kənd sakini Bəxtiyar Quliyevin idarə etdiyi “VAZ-2106” markalı, 42 BU 831 dövlət nömrə nişanlı minik avtomobili rayonun Parakənd qəsəbə sakini Eldar Aslanovun idarə etdiyi “Mercedes” markalı, 99 EA 802 dövlət nömrə nişanlı minik avtomobili ilə toqquşub. 

Hadisə yerinə dərhal Fövqəladə Hallar Nazirliyinin Cənub Regional Mərkəzinin xilasediciləri və təcili yardım maşınları cəlb olunub. Xilasedicilər xüsusi alətlərin köməyi ilə “VAZ-2106” markalı minik avtomobilində sıxılıb qalmış sürücünün və sərnişinlərin cəsədlərini, eləcə də bir nəfər yaralını, “Mercedes” markalı avtomobildən 6 yaralını çıxararaq Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin Lənkəran rayon şöbəsinə və Lənkəran Mərkəzi Rayon Xəstəxanasına yola salıblar. 

Yol-nəqliyyat hadisəsi zamanı “VAZ-2106” markalı avtomobilin sürücüsü, Lənkəran rayonunun Boladi kənd sakini Bəxtiyar Qiyas oğlu Quliyev, sürücünün həyat yoldaşı Əzizə Ağadadaş qızı Quliyeva, Boladi kənd sakinləri Bahar İmran qızı Bağırova və Nazilə Hacıbala qızı Seyfullayeva dünyasını dəyişiblər.

“Mersedes” markalı avtomobilin sürücüsü, Lənkəran rayonunun Parakənd qəsəbə sakinləri Eldar Zeynal oğlu Aslanov, Elman Balazər oğlu Ağazadə, Akif Əbülhəsən oğlu Nuriyev, Murad Orucəli oğlu Cəfərli, Elvin Həmzə oğlu Mirzəzadə və rayonun Boladi kənd sakini Reyhan Fərhad qızı Mahmudova Lənkəran Mərkəzi Rayon Xəstəxanasına yerləşdiriliblər.

Lənkəran Mərkəzi Rayon Xəstəxanasından bildiriblər ki, yaralılardan biri - Reyhan Fərhad qızı Mahmudova həkimlərin səyinə baxmayaraq xəstəxanada dünyasını dəyişib.