UEFA-dan qəzəb doğuran paylaşım - Şəkillər

UEFA-nın "Qalatasaray"la bağlı paylaşımı bu klubun əzəli rəqibi olan "Fənərbaxça" azarkeşlərinin narazılığına səbəb olub.

News24.az qoL.az-a istinadla xəbər verir ki, bu barədə Türkiyə mediası məlumat yayıb.

Məlumatda bildirilib ki, UEFA-nın Avropa Liqasının rəsmi sosial media hesabında "Qalatasaray"ın futbolçusu Yunus Akgünün şəkli "Yenilməz və Türkiyə Superliqasının zirvəsində" sözləri ilə paylaşılıb.

Bundan sonra "Fənərbaxça"lı azarkeşlər həmin paylaşıma yazdıqları yüzlərlə şərhlə etirazlarını bildiriblər. 

"Fənərbaxça" azarkeşlərinin təzyiqindən sonra UEFA daha bir paylaşım edib. "Qalatasaray"la bağlı postdan təxminən 1.30 saat sonra qitənin ali futbol qurumunun səhifəsi bu dəfə "Fənərbaxça"nın futbolçusu Yussef En-Nesrinin şəklini paylaşıb.

Qeyd edək ki, bu mövsüm həm "Qalatasaray", həm də "Fənərbaxça" UEFA Avropa Liqası yarışında iştirak edir.