Bakıda sexdə baş verən dəhşətli partlayışla bağlı YENİ XƏBƏR

Bakıda təmir sexində baş vermiş partlayışla bağlı Nərimanov Rayon Prokurorluğunda açılan cinayət işinin ibtidai istintaqı başa çatıb.
News24.az-ın məlumatına görə, Novruzbəyov Gülbala Siracəddinoviçin ölümü ilə nəticələnən hadisə ilə bağlı V.Əhmədov barəsində Azərbaycan Respublikasının Cinayət Məcəlləsinin 314.2-ci, yəni, səhlənkarlıq - zərərçəkmiş şəxsin ölümünə və ya digər ağır nəticələrə səbəb olduqda maddəsi ilə açılan işin materialları Nərimanov Rayon Məhkəməsinə göndərilib. İş hakim Tural Ələkbərovun icraatına verilib.
Qeyd edək ki, ilkin məlumatlarda faktla bağlı Cinayət Məcəlləsinin 162.2-ci, yəni əməyin mühafizəsi qaydalarının pozulmasının ölümlə nəticələnməsi maddəsi ilə cinayət işinin açıldığı qeyd edilmişdi.
Hadisəyə gəlincə, Nərimanov rayonunda yerləşən “Ruzigar” kiçik müəssisəsinə məxsus yük avtomobillərinin təmiri qarajında işləyən, 1971-ci il təvəllüdlü Novruzbəyov Gülbala Siracəddinoviç qarajda yük avtomobilinin təkərini təmir edərkən təkərin qəflətən partlaması nəticəsində ağır xəsarətlər alaraq hadisə yerində ölüb.