Mətbuat Şurasına 401 şikayət daxil oldu

“Mətbuat Şurasına 2019-cu ildə 401 müraciət daxil olub”.

News24.az-ın məlumatına görə, bu barədə Mətbuat Şurasının 2019-cu il üçün hesabatında bildirilir. Xəbərə görə, daxil olan müraciətlərdən 187-i kütləvi informasiya vasitələrində dərc olunan yazılardan şikayətdir.

187 şikayətin 91-i yazılı, 96-sı isə şifahi formada olub.

Şikayətlər üzrə Komissiyada 91 şikayətə baxılıb ki, onlardan 9-u əlavə tədbirlərin görülməsi üçün Şuranın Katibliyinə qaytarılıb. “Komissiyanın 82 şikayət üzrə çıxardığı rəydə cavabdeh media orqanlarının yol verdiyi nöqsanlar, AJPDQ-nın ayrı-ayrı prinsip və bəndlərinin pozulduğu vurğulanıb”, - deyə MŞ-nin hesabatında qeyd olunur.

Mətbuat Şurasına daxil olan şikayətlərin araşdırılması zamanı müəyyənləşdirilib ki, kütləvi informasiyası vasitəsi kimi internet üzərindən yayımlanan media orqanlarının fəaliyyətindən narazılıqlar daha çoxdur (şikayətlərin 90,4 faizi). Əvvəlki illərlə müqayisədə 2019-cu ildə bu göstərici özünün ən yüksək həddinə çatıb.

MŞ cavabdeh KİV-lərlə bağlı çıxardığı qərarlarda onlara daha çox – 39,3 faiz təkzib verməyi tövsiyə edib. Qarşı tərəfin mövqeyini işıqlandırmaq tövsiyəsi 29,1 faizlə ikincidir. Qərarların 25,6 faizi cavabdeh KİV-lərə xəbərdarlıq edilməsi ilə bağlıdır.