Britaniya kəşfiyyatı: Rusiya 400 min könüllünü orduya cəlb edə bilməyəcək

Britaniya kəşfiyyatı Rusiyanın bəyan etdiyi kimi daha 400 min nəfəri könüllü olaraq orduya cəlb edə bilməyəcəyini hesab edir.

News24.az xəbər verir ki, bu barədə Britaniya Müdafiə Nazirliyinin kəşfiyyat icmalında qeyd edilib. 

Departament Rusiya hakimiyyətinin əlavə 400 min hərbçinin hərbi xidmətə cəlb edilməsi məqsədi ilə genişmiqyaslı çağırış kampaniyasının başlanmasına hazırlaşdığını açıqlayıb.

"Rusiya bu kampaniyanı yeni məcburi səfərbərlik kimi deyil, könüllülərə, peşəkar kadrlara çağırış kimi təqdim edir. Regional hakimiyyət orqanlarının kişiləri orduya getməyə məcbur etməklə öz çağırış məqsədlərinə çatmağa çalışacağı real ehtimalı var”. 

İcmalda deyilir ki, Rusiya hakimiyyəti daxili narazılığı minimuma endirmək, kadr çatışmazlığı ilə məşğul olmaq üçün çox güman ki, “könüllülər” adlanan modelə üstünlük verib. Kampaniyanın 400 min real könüllünü cəlb etməsi ehtimalı azdır.

Departament Rusiyanın Ukraynada döyüş gücünün bərpasının təkcə şəxsi heyət tələb etməyəcəyini də vurğulayıb. Rusiyanın hazırda olduğundan daha çox sursat və hərbi texnikaya ehtiyacı var. /eurointegration.com.ua/

Teymur MƏMMƏDOV