Rusiya dizel ixracına qadağa qoyacaq?

Rusiya Baş nazirinin müavini Aleksandr Novak paytaxt Moskvada jurnalistlərə açıqlamasında ölkənin yanacaq bazarı ilə bağlı qiymətləndirmələr edib.

News24.az xəbər verir ki, Rusiyanın dizel istehsalının kafi səviyyədə olduğunu vurğulayan Novak, "Ciddi miqdarda istehsal etdiyimiz və hazırda vəziyyət çox stabil olduğu üçün dizel ixracına qadağa qoymayacağıq" dedi.

Novak iyulun 23-də verdiyi açıqlamada Rusiyada benzin ixracına qoyulan qadağanın avqustun 1-dən yenidən qüvvəyə minəcəyini bildirib.

Qeyd edək ki, Rusiyada neft emalı zavodlarının pilotsuz təyyarələrin hücumuna məruz qalması və xüsusilə kənd təsərrüfatı sektorunda tələbatın artması səbəbindən benzinin qiymətində artım olub.

Qiymət artımı ilə əlaqədar ölkədə hökumət vaxtaşırı ixraca məhdudiyyətlər qoyur.

Günel Məlikzadə