ADY-nin onillik strategiyası MÜZAKİRƏ EDİLDİ

"Azərbaycan Dəmir Yolları" (ADY) QSC-nin "2030 Koporativ Strategiya"sının hazırlanması məqsədi ilə bu il mayın 21-də dünyanın aparıcı şirkətlərindən olan "McKinsey&Company" ilə müqavilə imzalanıb, bu istiqamətdə təhlillər davam etdirilir.

ADY-dən News24.az-a verilən məlumata görə, iyulun 17-də Cəmiyyətin İdarə Heyəti və həmin şirkətin nümayəndələrinin iştirakı ilə videokonfrans təşkil olunub. Video-konfrans zamanı "McKinsey&Company" şirkətinin nümayəndələri layihənin gedişatı barədə ətraflı məlumat təqdim ediblər.

Məlumata əsasən, ADY-nin sədri Cavid Qurbanov əlverişli coğrafi mövqedən səmərəli istifadə etməklə, ölkə ərazisindən keçən beynəlxalq nəqliyyat dəhlizlərində dəmir yolunun artan roluna diqqət çəkib və son dövrlərdə bu istiqamətdə atılan məqsədyönlü addımların ölkənin tranzit potensialına müsbət təsirini vurğulayıb. Bu məqsədlə ADY-nin əməliyyat effektivliyinin artırılması ilə yanaşı, nəqliyyat zəncirinin bütün halqalarının prosesdə iştirakının artırılması və müvafiq dəhlizlərin inkişafında maraqlı tərəflərlə əməkdaşlığın vacibliyini qeyd edib.

Daha sonra, "McKinsey&Company" şirkətinin dəmir yolu sektoru üzrə beynəlxalq ekspertləri tərəfindən ADY-nin İdarə Heyətinə qlobal və regional dəmir yolu sektorunun icmalı və trendləri, COVID-19 pandemiyasının dəmir yolu sektoruna təsiri mövzularına dair təqdimat edilib. Strategiyanın daha uğurlu olması üçün qlobal və regional trendlərin gözlənilən təsirləri müzakirə olunub, bu mövzuda tərəflər arasında qarşılıqlı təcrübə mübadiləsi aparılıb.