O, yenidən Avropa Komissiyasının prezidenti seçildi

Avropa Komissiyasının sədri Ursula fon der Leyen cümə axşamı keçirilən kritik səsvermədə yenidən seçilib və vəzifəsini davam etdirmək hüququ qazanıb.

News24.az xəbər verir ki, Avropa Parlamentinin üzvləri iyun ayında keçirilən seçkilərdən sonra ilk parlament iclasında Ursula fon der Leyenə Avropa Komissiyasının sədri vəzifəsində daha beş il müddət veriblər.

Von der Leyen 720 yerlik parlamentdə 401 deputatın dəstəyini qazanaraq, Aİ-nin icra hakimiyyətinin başında qalmaq üçün lazım olan 361 səs çoxluğunu asanlıqla keçib.

Gizli səsvermədə 284 nəfər əleyhinə səs verib. Leyen əvvəlki seçkilərdə cəmi 9 səs fərqi ilə seçilib.

Von der Leyenin yenidən seçilməsi Ukraynadakı müharibədən tutmuş iqlim dəyişikliyinə, miqrasiya və mənzil çatışmazlığına qədər böhranlarla mübarizə aparan 27 dövlətdən ibarət blokun liderliyinin davamlılığını təmin edir.

Günel Məlikzadə